Beýik Saparmyrat Türkmenbaşy adyndaky Balkan welaýat döwlet drama teatrynyň döredijilik topary Gilgameş rowaýaty esasynda täze spektakly sahnalaşdyrýar.

Gadymy Gündogaryň beýik eserleriniň biri bolan Gilgameş eposy dünýä edebiýatynyň taryhynda iň gadymy eser hasaplanýar. Onda gadymy Şumer taryhynyň mifiki wakalary palçygyň ýüzüne ýazylypdyr.

Taryhy we hronologik ýarym rowaýat eposyny esas hökmünde alyp, türkmen dramaturgy Oguljennet Bäşimowa teatrda sahnalaşdyrmak üçin pýesa döretdi. Režissýor Öwezmämmet Galandarow taryhy wakalary sahnalaşdyrmagy maksat edindi. Onuň aýtmagyna görä, spektaklyň konsepsiýasy geçen ýyl goýlan synag sahna oýnunyň esasynda kemala gelipdir.

Sahna oýny gönüden-göni sazdyr çeperçilik tilsimlerine bagly bolýar. Taňrylaryň we ýarymtaňrylaryň şekillerini döredýän aktýorlar yhlasly taýýarlyk görüp, keşplerini içgin öwrenýärler. Laçyn Nuryýewa Iştar taňrysynyň keşbini ynandyryjylykly döredýär. Myratgeldi Satiýew Enkidunyň güýçli, ýiti häsiýetli keşbini döretmegiň üstünde işleýär. Rejepgeldi Nazgurbanow Uruk şäheriniň gujurly esgeri we hökümdary Gilgameşiň keşbinde çykyş eder.

Eser özüne mynasyp güýçli bäsdeş isleýän patyşa Gilgameş barada gürrüň berýär. Ol öz raýatlaryny gynap başlaýar. Adamlaryň arz-şikaýatlary günsaýyn artýar, olaryň nalyşy taňrylara ýetýär. Gilgameş aklyna aýlansyn diýip taňrylar ony synap, sada, päk ýürekli, wagşy şekilli Gilgameş ýaly güýçli Enkidu döredýärler.

Oýun goýujy režissýor Öwezmämmet Galandarow: 

– Bu köp aktýorly spektakl. Käbir sahnalary döredenimizde etýud usulynda işleýäris. Aktýorlar işe köp yhlas siňdirýärler, çünki olaryň öňünde tomaşaçylar ynanar ýaly edip oýnamaly diýlip uly wezipe goýuldy – diýdi.

Ýakyn wagtda spektakl teatryň repertuarynda peýda bolar. Häzirlikçe bolsa, Balkan welaýat döwlet drama teatry 5-nji noýabrda sagat 19:00-da «Bir günüň aladasy» spektaklyna çagyrýar.