Türkmenistanyň Magtymguly adyndaky milli sazly drama teatrynda Germaniýadan gelen pianinoçylaryň – Marsel Dorna we Ştefan Weýiň konserti boldy. Marsel we Ştefan ajaýyp sazandalar. Ikisi-de Bawariýadaky Allgoý sebitinden we ikisiniňem ýaşy deňdir.

Öz wagtynda olaryň degişmeleri aýdym-saz mugallymlarynyň gaharyny getirerdi we degişgen okuwçylar beýle zehinli bolmadyk bolsa, elbetde aýdym-saz edaralaryndan kowulardylar.

Marsel we Ştefan 27 ýyl bäri bilelikde çykyş edip gelýärler. Olaryň sözlerine görä, olar 100 ýurtda şonuň bilen birlikde Täjigistanda we Gazagystanda jemi 1000 konsert berdiler. Iki sany şadyýan sazanda: «Roýaly çalmak asla kyn däl» diýýär. Sahnada pianinoçylaryň ýüzi we elleri görkezilen ekran bar. Marsel we Ştefan çykyşlarynda meşhur aýdym-saz eserlerini düşündirmeklige çalyşýarlar. Olar meşhur «Happy birthday to you» hitini Ştrausyň «Walsy», Rossininiň «Sewilýa dellekçisi» ýa-da Wiwaldiniň «Ýylyň pasyllary» eserleri bilen birleşdirýärler. Olaryň aýdym-sazdaky bu usullary diňleýjilerde oňyn seslenme döredýär.

Konsertiň ahyrynda pianinoçylar Rimskiý-Korsakowyň iň çalt eseri bolan «Arynyň uçuşy» atly eserini ýerine ýetirdiler. El çarpyşmalar kiparlansoň, Germaniýadan gelen myhmanlar tomaşaçylaryň näme isleýändiklerini soradylar: 

«Ikinji gezek haýsy eseri täzeden ýerine ýetirmegimizi isleýärsiňiz? Kim haýal çalynýan eseri isleýär? Kim çalt çalynýan eseri isleýär?» Çalt çalynýan eseriň tarapdary köp boldy.

Zaldakylar Marsel bilen Ştefanyň aýdym aýdyp, tans edýän şowhunyna tomaşa etdiler. Şowmenler tomaşaçylary haýran galdyrdy. El çarpyşmalar wagtynda sazandalara tahýalar sowgat berildi. Konsert tamamlandy, ýöne tomaşaçylar gitmediler, hemmeler degişgen sazandalar bilen surata düşdiler.

Konsert Türkmenistanyň Medeniýet ministrliginiň we teatryň administrasiýasynyň ýardam bermeginde FRG-niň Türkmenistandaky Ilçihanasy tarapyndan guraldy.