Türkmenistanyň Döwlet medeniýet merkeziniň Mukamlar köşgünde Türkmenistanda Ýewropa Bileleşiginiň Medeniýet günleriniň çäginde Aşgabat çagalar horunyň konserti geçirildi.
Hora gatnaşyjylar Aşgabat şäheriniň 1-nji we 4-nji çagalar sungat mekdebiniň we Maýa Kulyýewa adyndaky Türkmen milli konserwatoriýasynyň ýanyndaky ýörite sazçylyk mekdep-internatynyň çagalary bolup durýar. Ýaş aýdymçylara Resul Gylyjowyň ýolbaşçylygyndaky kamera orkestri ýoldaşlyk edýär, ýöne Ýewropadan gelen myhman Wita Timerman dirižýorlyk etdi.
 |
 |
Konsert Liz Arne tarapyndan döredilen «Viva la musica» aýdymy bilen açyldy, onda Ýer ýüzünde parahatçylygy goramakda aýdym-sazyň ägirt uly ähmiýeti barada gürrüň berilýär. Nury Halmämmedowyň «Durnalar» aýdymy ýerine ýetirilende, wideoşekiller arkaly bu owadan guşlaryň durmuşy beýan edildi. Raýmond Raulsyň «Aspazija» çagalar aýdymlary «Waskyň galasy», «Aglaýan asman», «Roždestwo», «Çakylyk» ýaly hekaýalary özünde jemledi.
Horuň diňe aýdymçy gyzlarynyň aýdym aýtmaklary bolsa aýratyn häsiýetli boldy. Bütin dünýäde tanalýan fransuz, nemes we italýan aýdym-saz eserleriniň ýerine ýetirilişinde «Santa Lusiýa» aýdymyny jadyly ýerine ýetiren hor solisti Anna Weliahmedowanyň çykyşy tomaşaçylarda ýatdan çykmajak duýgulary galdyrdy. Tomaşaçylar onuň çykyşyny el çarpyşmalar bilen garşyladylar.
 |
 |
Konsertiň soňy has gyzykly boldy – çagalar hory Nury Halmämmedowyň türkmen halkynyň «Türkmen sährasy» atly söýgüli aýdymyny ýerine ýetirdi. Aýdymyň ilkinji owazyndan tomaşaçylar hora goşulyp, el çarpyp başladylar. Tomaşaçylaryň yzygiderli el çarpyşmalaryna jogap beren hor meşhur «Aliluýa» aýdym-saz eserini ýerine ýetirdi. Tomaşaçylar alnan estetiki lezzet üçin hoşallyk bildirip, dirižýor Wite Timermana gülli sebet sowgat berdiler.
Türkmenistanda Ýewropa Bileleşiginiň Medeniýet günleriniň çäginde ýene bir konserti Mary çagalar hory bilen geçirmek meýilleşdirilýär.
Aýjemal Bäşimowa,
Maýa Kulyýewa adyndaky Türkmen milli konserwatoriýasynyň ýanyndaky Daňatar Öwezow adyndaky Türkmen döwlet ýörite sazçylyk mekdebiniň sazandasy we mugallymy.
