Mary welaýatynyň Kemine adyndaky döwlet drama teatrynda 2024-nji ýylyň «Pähim-paýhas ummany Magtymguly Pyragy» şygary mynasybetli bagşylaryň bäsleşigi geçirildi.
Bagşylaryň bäsleşigi Mary şäheriniň ýaşaýjylary üçin hakykatdan-da ajaýyp waka boldy. Zala hormatly ýaşulular, medeniýet we sungat işgärleri, jemgyýetçilik guramalarynyň wekilleri ýygnandylar.
Ussat bagşylar bäsleşigiň myhmanlaryna we emin agzalaryna halk aýdymlaryny, türkmen edebiýatynyň beýik şahyry Magtymguly Pyragynyň goşgularyna aýdymlaryny hödürlediler. Sazandalar milli saz guraly – dutarda elleriniň ýüwrükligini hem-de saz çalmak sungatynyň iň gowy däplerini görkezdiler.
Mälim bolşy ýaly, dutar ýasamak senetçiligi hem-de dutarda saz çalmak we bagşyçylyk sungaty ÝUNESKO-nyň Adamzadyň maddy däl medeni mirasynyň sanawyna girizildi. Bagşyçylyk sungatynyň däplerini dowam etdirmek we ösdürmek üçin ýurdumyzda ýaňy başlan bagşylaryň hem-de ýaşlaryň arasynda yzygiderli döredijilik bäsleşikleri geçirilýär.
Geçen ýyl medeni mirasy wagyz etmek maksady bilen, geçirilen «Çalsana, bagşy!» uly bäsleşik Türkmenistanyň dürli künjeklerinden täze zehinli bagşylary ýüze çykardy. Şu ýylky bäsleşik hem geljegi uly sazandalary we türkmen milli bagşyçylyk mekdebiniň zehinli wekillerini kesgitledi.
Ýylyň şygaryna we Magtymguly Pyragynyň doglan gününiň 300 ýyllygyna bagyşlanan bäsleşikde birinji orny Mary şäheriniň Bagşylar öýüniň wekili bagşy Rüstem Onbegiýew eýeledi. Ikinji orna Ýolöten etrabynyň medeniýet merkeziniň Bagşylar öýünden Allamyrat Gurbanow mynasyp boldy. Wekilbazar etrap medeniýet merkeziniň Bagşylar öýünden Ogulkeýik Esenowa döredijilik bäsleşiginiň üçünji ornuny eýeledi.
Ýeňijilere Mary welaýatynyň Halk döredijiligi merkeziniň hormat hatlary we ýadygärlik sowgatlary gowşuryldy.
