A.S.Puşkin adyndaky döwlet rus drama teatryň aktýorlary ýaş tomaşaçylar üçin ajaýyp sowgat taýýarladylar.

Sahnada Eduard Uspenskiniň iň gowy görýän gahrymanlary Krokodil Gena we Çeburaşka Nikolaý Zinçenkonyň «Çeburaşkanyň ogurlanmagy» pýesasynda. Zinçenkonyň sözlerine görä, möjek Çeburaşkany doňdurma çalyşmak üçin Krokodil Genanyň doglan gününde alyp gaçypdyr. Elbetde, bu hilegärlige mekir we özüne çekiji tilkisiz, şeýle hem alyp gaçyjylary paş etmäge kömek eden dogruçyl we adalatly Totti gurbagasyz bolup bilmezdi.

Ýaş režissýor Kyýat Gurbanow bu hekaýany sahnada gaty aýdyň görkezmegi başardy, aktýorlar Mariýa Durdyýewa (Çeburaşka), Swýatoslaw Lawin (Krokodil Gena), Alina Andronowa (Totti gurbaga), Merdan Nurmuhammedow (Möjek), Anastasiýa Balandina (Tilki), Lýubow Emelýanowa (Baba Ýaga), Gulmuhammet Saryýew (Doňdurma satyjysy) we Mihail Kustodow (Sergeý Mihalkowyň ertekisinden polisiýa işgäri Stýopa daýy).

Aktýorlar öz keşplerini ussatlyk bilen ýerine ýetirdiler, şonuň üçin her bir gahryman öz aýratynlygy bilen ýüze çykdy. Sahna bezegçisi suratkeş Wepa Annaberdiýew sahna bezegine örän döredijilikli çemeleşipdir we sahnada wakalaryň bolup geçýän ýerini şadyýan şäher görnüşleri bilen ajaýyp şekillendiripdir. Sahna Begenç Kakaýew bilen Alina Andronowanyň ajaýyp aýdym-saz bezegi bilen tapawutlanýar.

Kyýat Gurbanowyň «Çeburaşkanyň ogurlanmagy» – režissýorlyk edýän üçünji pýesasydyr. Beýleki iki sahna çykyşy – «Kolobok» we «Bir ispan gijesi» hem uly üstünlik gazandy. Kyýat: «Iş tejribämiň azdygyna garamazdan, men bir zada göz ýetirdim – eger spektakly režissýorlar we aktýorlar halasa üstünlik kepillendirilýär» diýdi.

Bu ajaýyp ertekiniň akyl beriji täsiri bar: gahrymanlary gowa we erbede bölüp, ahyrynda gowy bolmagyň nähili abraýlydygyny we erbet bolmagyň nähili utandyryjydygyny görkezýär. «Çeburaşkanyň ogurlanmagy» pýesasynyň gahrymanlary ýakyn wagtda ilkinji gezek sahna çykyşynda çagalar bilen duşuşarlar. Elbetde, çagalar bu ertekiden hoşal bolarlar.