Türkmenistanyň muzeýlerinde halkymyzyň medeni mirasyny wagyz etmek boýunça dürli çäreler geçirilýär. Bu mirasyň bir bölegi-de keşde çekmek sungatydyr.

Nesilden-nesle geçip gelýän bu hünär çeper elli türkmen zenanlarynyň inçeden yzarlaýan çeperliginiň, nagyş we reňk utgaşmasyny duýşunyň, tükeniksiz çeper hyýalynyň aýdyň ýüze çykmasydyr. Milli keşdäniň nagyşlarynda halkyň taryhy, tebigaty we däp-dessurlary bilen baglanyşykly möhüm alamatlar şekillendirilipdir.

Ýakynda Arkadag şäheriniň Taryhy we ülkäni öwreniş muzeýiniň Kärdeşler arkalaşygynyň şäher bölümi we Türkmenistanyň Zenanlar birleşiginiň Merkezi geňeşi bilen bilelikde geçiren «Zenan mährinden dörän nepislikler» atly duşuşyk-da gadymy we baky diri keşde sungatyna bagyşlandy. Çärä Arkadag şäherinde ýaşaýan Ogulbagt Hudaýnazarowa, Arkadag şäheriniň Taryhy we ülkäni öwreniş muzeýiniň müdiriniň orunbasary Käkilik Öwezberdiýewa, Arkadag şäher Medeniýet müdirliginiň Şükür bagşy adyndaky Arkadag şäher çagalar sungat mekdebiniň mugallymy Maýa Sähedowa, ýöriteleşdirilen 2-nji orta mekdebiň mugallymy Enar Agaýewa dagy gatnaşdy.

Olar nesilden-nesle geçýän milli mirasyň gymmaty, ony gorap saklamak we wagyz etmek boýunça muzeýlerde alnyp barylýan işler, gadymy keşde sungatynyň biziň günlerimizde ösüşi barada gürrüň berdiler. Duşuşyga gatnaşanlar türkmen zenanynyň ruhy gözelligi we çeper eli bilen döredilen sungatyň adamzadyň medeni baýlygy diýlip ykrar edilmeginden duýýan buýsanjyny beýan etmek bilen, türkmen halkynyň keşdeçilik sungatynyň ÝUNESKO-nyň Adamzadyň maddy däl medeni mirasynyň sanawyna girizilendigini bellediler.