2-nji maýda Marynyň Hydyr Derýaýew adyndaky Mugallymçylyk mekdebi Türkmenistanyň Ylymlar akademiýasynyň alymlarynyň, ýokary okuw mekdepleriniň mugallymlarynyň we talyplarynyň gatnaşmagynda «Magtymguly Pyragy – türkmen halkynyň paýhasly dünýäsi» atly ylmy we amaly maslahat geçirdi. Çäre Mary welaýatynyň «Bagt köşgünde» geçirildi. Onda giriş sözi bilen mekdebiň müdiri Maral Annagulyýewa çykyş etdi.
Ol beýik akyldar we nusgawy şahyryň doglan gününiň 300 ýyllygyny bellemek boýunça milli maksatnamanyň çäginde guralan bu çäräniň garyşyk görnüşde geçiriljekdigini aýtdy.
Maslahatyň açylyşynda Türkmenistanyň Ylymlar akademiýasynyň aspirantura bölüminiň müdiri Gülälek Annanepesowa, Ylymlar akademiýasynyň Dil, edebiýat we milli golýazmalar institutynyň halk döredijiligi bölüminiň müdiri Güljemal Gummanowa, Ylymlar akademiýasynyň Taryh we arheologiýa institutynyň öňdebaryjy işgäri Kakajan Baýramow, Magtymguly adyndaky Türkmen döwlet uniwersitetiniň baýry mugallymy, ÝUNESKO bölüminiň müdiri Bike Diwangulyýewa, Seýitnazar Seýdi adyndaky Türkmen döwlet mugallymçylyk institutynyň baýry mugallymy Agamämmet Ýazmyradow dagy çykyş etdi.
Olar beýik ussadyň öçmejek eserleriniň seljermesine esaslanan çykyşlarynda şahyryň döredijilik mirasynyň dürli taraplaryny açyp görkezdiler, watançylyk we ynsanperwerlik garaýyşlarynyň çuňlugyny, wajyplygyny, eserlerindäki etnografik maglumatlaryň ähmiýetini bellediler. Hydyr Derýaýew adyndaky Mugallymçylyk mekdebiň iňlis dili we edebiýaty mugallymy Maral Gurbangeldiýewa bolsa Magtymguly Pyragynyň goşgularynyň iňlis diline terjimesi barada gürrüň berdi.
Internet arkaly ylmy çekişmä goşulan Magtymguly adyndaky Dil, edebiýat we milli golýazmalar institutynyň işgärleri öz çykyşlaryny Magtymgulynyň we Nesiminiň filosofik lirikasy, beýleki şahyrlaryň döredijiliginde Pyragynyň çeper keşbi, terbiýä bolan garaýyşlary we beýik watançy şahyryň özygtyýarly hem erkin türkmen döwleti baradaky arzuwlary bilen baglanyşykly mowzuklara bagyşladylar.
Çäräniň çäginde konsert bolup, onda mekdebiň talyplary Magtymguly Pyragynyň sözlerine aýdymlary ýerine ýetirdiler. Şeýle hem çärä gatnaşanlar üçin Mary welaýatynyň Taryh we ülkäni öwreniş muzeýine gezelenç guraldy hem-de sadaka berildi.
