Yslam Babaýewiň ady türkmen saz sungatynyň taryhyna ymykly girdi. Ol Maýa Kulyýewa adyndaky Türkmen milli konserwatoriýasynyň ýanyndaky Daňatar Öwezow adyndaky Türkmen döwlet sazçylyk ýörite orta hünär mekdebinde we konserwatoriýada gitara ugruny açyp, milli gitara mekdebiniň kemala gelmegine we ösmegine saldamly goşant goşdy.

Her ýyl görnükli gitaraçynyň hatyrasyna onuň ýoluny dowam edýänler gitara sazlarynyň festiwalyny geçirýärler, bu ýerde esasy saz guraly özleşdirmekde ilkinji ädimlerini ýerine ýetirýän ýaş sazandalara berilýär.

Sazçylyk mekdepleriniň okuwçylary üçin Maýa Kulyýewa adyndaky Türkmen milli konserwatoriýasynyň Kiçi zalynda çykyş etmek hemişe uly jogapkärçilik. Çünki zaldaky myhmanlaryň arasynda ussatlar we döredijilik ýokary okuw mekdebiniň mugallymlary bar.

Tejribeli halypalaryň ýolbaşçylygynda tälim alýan ýaş gitaraçylar öz sazanda ukyplaryny ýene bir gezek üstünlikli görkezdiler.

Konsert esasan «Nar agajy», «Çoh derde goýan ýarym», «Meleguş» we beýleki gitarada çalmaga uýgunlaşdyrylan türkmen milli sazlaryndan ybaratdy.

Konsert Maýa Kulyýewa adyndaky Türkmen milli konserwatoriýasynyň ýanyndaky Ýörite sazçylyk mekdep-internatynyň okuwçylarynyň çalmagynda Yslam Babaýewiň «Bahar heňi» eseri bilen açyldy. Paýtagtymyzyň 3-nji, 4-nji we 5-nji çagalar sazçylyk mekdepleriniň okuwçylary, şeýle hem Maýa Kulyýewa adyndaky Türkmen milli konserwatoriýasynyň okuwçylary sahnada öz zehinini görkezdiler.

Olar Maýa Kulyýewa adyndaky Türkmen milli konserwatoriýasynyň uly mugallymy Myrat Gurbanowyň we Aşgabat şäheriniň 3-nji sazçylyk mekdebiniň mugallymy Leýla Nasyrowanyň düzen we yzygiderli üsti ýetirilýän ýörite ýygyndan belli türkmen halk sazlaryny öwrenýärler.

– Golaýda meşhur türkmen kompozitorlary Nury Halmämmedowyň, Daňatar Öwezowyň, Durdy Nuryýewiň, Weli Ahmedowyň, Şamämmet Bäşimowyň eserlerini öz içine alýan täzelenen neşiri tamamladyk. Gitara üçin düzülen türkmen kompozitorlarynyň gaýtadan işlän türkmen halk sazlarynyň hem-de pýesalarynyň ýygyndysynda diňe bir özbaşdak çykyş etmek üçin däl, eýsem, ikilikde, üçlükde we dörtlükde çykyş etmek üçinem notalar bar – diýip Leýla Nasyrowa gürrüň berýär.

Okuw gollanmasy ýaş gitaraçylary türkmen aýdym-saz mirasynyň iň gowy nusgalary bilen tanyşdyrmak, repertuarlaryny halk aýdym-sazlary we ajaýyp kompozitorlaryň eserleriniň hasabyny has-da baýlaşdyrmak maksady bilen döredildi.