Türkmenistanyň at gazanan artisti Wladimir Mkrtumow üçin paýtagtymyzda geçiriljek konsertden öň ýurdumyzyň sebitlerinde çykyş etmegi asylly däbe öwrüldi. Ussadyň konserti 17-nji maýda Sahy Jepbarow adyndaky Arkadag şäher ýörite sungat mekdebinde Frederik Şopeniň eserlerinden başlanar. Konserte giriş tölegsiz.

Habarçymyz:

– Konsertde haýsy eserler ýaňlanar?

Meşhur pianinoçy:

– Köpden bäri Şopeniň iki sonatasyny çalmagy niýet edip ýördüm. Ýöne konsert üçin diňe iki sonata ýeterlik däl ahyry. Repertuarymda Şopeniň ajaýyp polonaizleri, walslary we prelýudiýalary bar, ýöne olar esasy eserlerden – ikinji we üçünji sonatalardan ünsüni sowup biljek. Ikinji sonatadan öň iki noktýurn ýerine ýetirmegi makul bildim. Emma üçünjiden öň näme çalmaly?

– Bu meseläni nädip çözdüňiz?

– Moskwa konserwatoriýasynyň dosenti Ýakow Kasnelsona şeýle sowal berdim welin, ol derrew çözgüdi tapdy: «Näme üçin ony çylşyrymlaşdyrýarsyň?! Ýene iki noktýurn çalsaň ýetik bolar!» diýdi. Ajaýyp pikir, näme üçin bu meniň kelläme gelmändir... Ussadyň meselä gaýry garaýşyny diýsene!

– Wladimir Sergeýewiç, näme üçin Şopeni saýladyňyz, häzir onuň ýubileýi däl ahyry?

– Köplenç, sazandalar eseri bu sazy çalanda özüniň ýüregindäki duýgularyny diňleýjä ýetirmek üçin saýlaýarlar.

– Saparyňyzy Sahy Jepbarow adyndaky Arkadag şäher ýörite sungat mekdebiniň okuwçylary bilen duşuşykdan başlaýarsyňyz, soňra ugur nirä?

– Soňra 19-njy maýda Marynyň Ýolaman Hummaýew adyndaky ýörite sazçylyk mekdebiniň, şol günem Lebap welaýatynyň ýörite sungat mekdebiniň okuwçylary bilen duşuşarys. Bu konsertlere giriş hemme isleg bildirýänler üçin tölegsizdir.

Soňra paýtagtymyzyň saz muşdaklary üçin 22-nji maýda «Aşgabat» medeni-dynç alyş seýilgähiniň konsert zalynda çykyş etmekçi.

Aşgabat şäherindäki konsert barada maglumat almak üçin: 22-38-98, +993 63 467177/514157, +993 61 338829, +993 64 037456 belgilere jaň edip bilersiňiz.

– Size üstünlik arzuw edýäris.