Türkmenistanyň Prezidenti Serdar Berdimuhamedow sanly ulgam arkaly Ministrler Kabinetiniň mejlisini geçirdi. Onda şu ýylyň ýanwar–sentýabr aýlarynda ýurdumyzyň pudaklarynda alnyp barlan işleriň netijeleri jemlenildi.

Ministrler Kabinetiniň Başlygynyň orunbasary B. Mämmedow ylym-bilim ulgamynyň, saglygy goraýyş we sport pudaklarynyň garamagyndaky edaralarynyň alyp baran işleri barada hasabat berdi.

Wise-premýer hasabat döwründe şu ýylyň dokuz aýynyň dowamynda ylymly-bilimli nesli terbiýelemäge gönükdirilen özgertmeleriň dowam etdirilendigini, okatmagyň öňdebaryjy usullarynyň bilim işine giňden ornaşdyrylandygyny belledi. Okuwçy we talyp ýaşlar halkara bilim bäsleşiklerine gatnaşyp, jemi 1040 medal gazandylar.

Hormatly Prezidentimiz Serdar Berdimuhamedow hasabaty diňläp, ýurdumyzyň ylym, bilim, saglygy goraýyş we sport ulgamynyň işini yzygiderli kämilleşdirmegiň, bilim edaralarynda ýaşlara döwrebap ylym-bilim bermek işine aýratyn üns bermegiň zerurdygyny aýtdy.