Türkmenistanyň Prezidentiniň eziz Diýarymyzy bagy-bossanlyga öwürmek syýasatyndan ugur alyp, Türkmenistanyň Bilim ministrligi we Kärdeşler arkalaşyklarynyň Milli merkezi ýurdumyzyň umumybilim berýän orta mekdepleriniň we mekdebe çenli çagalar edaralarynyň arasynda «Bagy-bossanlyga we gülzarlyga beslenen iň gowy mekdep» we «Bagy-bossanlyga we gülzarlyga beslenen iň gowy çagalar bagy» atly bäsleşik geçirdiler.
Bäsleşik ýaşlara çagalykdan tebigata söýgini we daşky gurşawa aýawly çemeleşmegi öwretmegi, ösüp gelýän ýaş nesli umumymilli ekologiýa hereketine çekmegi, olaryň ekologiýa medeniýetini ýokarlandyrmagy maksat edinýär.
Bäsleşigiň dowamynda gülleri, miweli daragtlary ekmekde, tebigat burçlaryny we beýleki ekologik çäreleri guramakda has ýokary netije gazanyp, Baş baýraga mynasyp bolan we 1,2, 3-nji orunlary eýelän mekdepler we çagalar baglary kesgitlenildi.
Eminler toparyna diňe bir çagalar däl, eýsem olaryň ata-eneleriniň gatnaşan çäreleri baradaky hasabatlar, wideoşekiller, taslamalar iberildi. Dürli ekologik çärelere taýýarlyk işleri we olaryň geçirilmegi çagalaryň dogduk Diýar, onuň bioköpdürlüligi baradaky düşünjelerini artdyrdy, ony goramagyň wajyplygyna, şeýle hem her kimiň oňaýly daşky gurşawy döretmäge şahsy goşandyna düşünmäge ýardam etdi.
28-nji noýabrda Aşgabat şäherindäki 81-nji umumy bilim berýän orta mekdepde bäsleşigiň ýeňijilerini sylaglamak dabarasy boldy we dabarada ýeňijilere hormat hatlary hem-de gymmat bahaly sowgatlar gowşuryldy. Baş baýraga Balkan welaýatynyň Magtymguly etrabyndaky 16-njy orta mekdebi we Ahal welaýatynyň Gökdepe etrabyndaky 14-nji çagalar bagy mynasyp boldular. Mekdepleriň arasynda Mary şäherindäki zehinli çagalaryň 24-nji mekdebi 1-nji, Daşoguz şäherindäki daşary ýurt dillerini çuňlaşdyryp öwredýän 10-njy mekdebi 2-nji we Ahal welaýatynyň Ak bugdaý etrabyndaky 6-njy orta mekdebi 3-nji orna mynasyp boldular.
Ýurdumyzyň mekdebe çenli çagalar edaralarynyň arasynda Mary şäherindäki 7-nji, Lebap welaýatynyň Kerki etrabyndaky 26-njy we Daşoguz şäherindäki 36-njy çagalar baglary 1-nji, 2-nji hem-de 3-nji orunlara mynasyp boldular.
