Türkmenistanyň Daşary işler ministrliginiň Halkara gatnaşyklary institutynyň mejlisler zalynda «Halklaryň dostlugy – ýaşlaryň bagtly geljeginiň kepili» atly halkara ýaşlar maslahaty geçirildi.
Oňa BMG-niň Türkmenistandaky düzümleriniň we guramalarynyň, şol sanda BMG-niň ÖM-niň, ÝUNISEF-iň, BNG-niň IG-niň wekilleri gatnaşdylar. Ýurdumyza Türkmenistanyň Magtymguly adyndaky Ýaşlar Guramasynyň Merkezi geňeşiniň başlygy, ýolbaşçylary, mugallymlar we talyplar, şol sanda DUM-niň ýaş ilçileri we Türkmenistanyň DIM-niň Halkara gatnaşyklary institutynyň, Magtymguly adyndaky Türkmen döwlet uniwersitetiniň, Halkara ynsanperwer ylymlary we ösüş uniwersitetiniň, Döwletmämmet Azady adyndaky Türkmen milli dünýä dilleri institutynyň ÝUNESKO-nyň klublarynyň wekilleri wekilçilik etdiler.
Maslahatda BMG-niň Türkmenistandaky Hemişelik utgaşdyryjysy Dmitriý Şlapaçenko, BMG-niň Ösüş Maksatnamasynyň (BMG-niň ÖM-niň) Türkmenistandaky hemişelik wekili Narine Saakýan, ÝUNISEF-iň Türkmenistandaky wekili Mohammad Faýazi, Türkmenistanyň Magtymguly adyndaky Ýaşlar Guramasynyň Merkezi geňeşiniň başlygy Ýazpolat Keriýew, Türkmenistanyň DIM-niň HGI-niň okuw işleri boýunça prorektory Gülşat Ýusupowa, HYY we ÖU-nyň ylmy işler boýunça prorektory Nurmuhammet Şyhlyýew we beýlekiler çykyş etdiler.
Çykyşlarda bellenilişi ýaly, ýaşlar syýasaty soňky ýyllarda bilelikdäki iş tejribesini toplan Türkmenistan bilen BMG-niň arasyndaky esasy ugurlaryň biridir. Bilim taslamalary üstünlikli durmuşa geçirilýär. Muňa ýurdumyzyň ýokary okuw mekdeplerinde ÝUNESKO kafedralarynyň we ÝUNESKO-nyň klublarynyň döredilmegi, Türkmenistanyň orta mekdepleriniň ÝUNESKO-nyň Assosirlenen mekdepler ulgamyna girizilmegi mysal bolup biler. Mundan başga-da, Türkmenistanyň Magtymguly adyndaky Ýaşlar Guramasy ÝUNESKO-nyň Ählumumy Ýaşlar Bileleşiginiň resmi agzasy boldy.
Türkmenistanyň BMG-niň kabul eden umumydünýä ähmiýetli Durnukly ösüş maksatnamasynyň üstünlikli durmuşa geçirilmegine möhüm goşant goşýandygy nygtaldy. DÖM-e ýetmek oňa gatnaşyjy ýurtlaryň durmuş, ykdysady we ekologiýa durnuklylygynyň deňagramlylygyny üpjün etmäge gönükdirilen ählumumy wezipeleri çözmekde edýän tagallalaryny birleşdirmegi göz öňünde tutýar. DÖM arkaly ýaşlar bilen baglanyşykly meseleler toplumyny çözmek göz öňünde tutulýar. Olaryň arasynda ýokary hilli bilimi ösdürmek, ylmy we döredijilik mümkinçiliklerini durmuşa geçirmek üçin mümkinçilikleriň we şertleriň döredilmegi, ýaşlaryň hukuklaryny goramak ýaly wezipeler bar.
Bellenilişi ýaly, ýaşlar tutuş dünýäde parahatçylygy we durnuklylygy gazanmak, bagtly, abadan we gülläp ösýän geljegi gurmakda ilerlediji güýç bolup durýar. Türkmenistanda ýaş nesle aýratyn üns berilýär, ýaşlaryň şahsy ösüşi we öz mümkinçiliklerini durmuşa geçirmegi üçin ähli şertleri döredýär.
Şu nukdaýnazardan, 2023-nji ýylyň ýurdumyzda «Arkadag Serdarly bagtyýar ýaşlar ýyly» diýlip yglan edilmegi simwoliki ähmiýete eýedir. Häzirki wagtda ýurdumyzyň durmuşyna işjeň gatnaşýan we dürli ugurlarda ähmiýetli üstünlikler gazanýan zehinli türkmen ýaşlaryna uly umyt baglanýar. Döwrümiziň möhüm meseleleri boýunça köptaraplaýyn halkara gatnaşyklaryň ösdürilmeginde ýaşlaryň tutýan orny uludyr. Şu ýyl kabul edilen 2023–2030-njy ýyllar üçin Türkmenistanyň ýaşlarynyň halkara hyzmatdaşlygy strategiýasy beýleki ýurtlaryň ýaşlary bilen gatnaşygyny pugtalandyrmaga niýetlenendir.
Maslahatda dünýä ýurtlary bilen birek-birege hormat goýýan, parahatçylykly, ynamly we aç-açan gatnaşyklaryň işjeň goldawçysy bolan Türkmenistanyň başlangyjy bilen 2023-nji ýylyň BMG-niň Baş Assambleýasynyň Kararnamasyna laýyklykda «Parahatçylygyň kepili hökmünde dialogyň halkara ýyly» diýlip yglan edilendigi nygtaldy. Türkmen halkynyň Milli Lideri Gurbanguly Berdimuhamedowyň öňe süren «Dialog – parahatçylygyň kepili» filosofiýasy halkara jemgyýetçiliginiň Zeminde parahatçylykly we ynanyşykly ýaşamak däplerini güýçlendirmek ugrundaky tagallalaryny birleşdirmäge gönükdirilendir.
Maslahata gatnaşanlar «Halklaryň dostlugy – ýaşlaryň bagtly geljeginiň kepili» atly halkara ýaşlar maslahatynyň geçirilmegi ýurtlaryň arasynda dostlugy we özara hormaty berkitmäge, umumy bagtly hem-de durnukly geljegi gurmakda parahatçylykly gatnaşyklaryň ähmiýetine düşünmäge, ýaş nesliň jahanda durnuklylygy we howpsuzlygy üpjün etmek üçin bilelikdäki köptaraplaýyn çärelere has işjeň gatnaşmaga goşant goşjakdyklaryna ynam bildirdiler.
Maslahata gatnaşyjylar üçin institutyň eýwanynda türkmen ýaşlarynyň, Garaşsyz, hemişelik Bitarap döwletimiziň gazananlaryny, şeýle hem türkmen halkynyň baý taryhyny we medeniýetini, halkymyza gadymdan mahsus hoşniýetli goňşuçylyk, myhmansöýerlik däplerini, dünýä halklaryna parahatçylykly we hormat goýmagyň ýörelgelerini giňişleýin beýan edýän özboluşly serginiň guralandygyny hem aýtmak gerek.
