6-njy martda Türkmenistanyň Daşary işler ministrliginiň Halkara gatnaşyklary institutynyň we Azerbaýjan Respublikasynyň ADA uniwersitetiniň wekilleri ýokary okuw mekdepleriniň arasynda hyzmatdaşlyk etmegiň meselelerine bagyşlanan onlaýn duşuşygyny geçirdiler.

Çärä Türkmenistanyň Azerbaýjan Respublikasyndaky Adatdan daşary we Doly ygtyýarly ilçisi G.Elýasow, Azerbaýjan Respublikasynyň Türkmenistandaky Adatdan daşary we Doly ygtyýarly ilçisi G.Gezalow, Türkmenistanyň DIM-niň Halkara gatnaşyklary institutynyň okuw işleri boýunça prorektory G.Ýusupowa, Türkmenistanyň DIM-niň HGI-niň halkara gatnaşyklary we diplomatiýasy kafedrasynyň professory, sosial ylymlaryň doktory O.Muhammetberdiýew hem-de Azerbaýjan Respublikasynyň ADA uniwersitetiniň prorektory F.Ismailzade gatnaşdylar.

Ikitaraplaýyn duşuşyk ylym we bilim ulgamynda özara gatnaşyklary işjeňleşdirmek we netijeli ösdürmek, hususan-da, okuw-bilim başlangyçlaryny, bilelikdäki taslamalaryny durmuşa geçirmek hem-de ylmy işleri alyp barmak arkaly ýurtlaryň ýokary okuw mekdepleriniň arasyndaky gatnaşyklary pugtalandyrmak maksady bilen geçirildi.

Şunuň bilen baglylykda, bilelikde işlemegiň anyk ugurlary hem-de özara hereketleriň geljekki mümkinçilikleri bilen baglanyşykly meseleler giňden ara alnyp maslahatlaşyldy. Hususan-da, taraplar okuw maslahatlaryny guramagyň, ylmy barlaglary geçirmegiň, ylmy makalalary, okuw kitaplaryny we okuw gollanmalaryny taýýarlamagyň hem-de neşir etmegiň, şeýle hem okuw maksatnamalaryny alyşmagyň mümkinçiliklerine garadylar.

Duşuşygyň dowamynda türkmen we azerbaýjan ýokary okuw mekdepleriniň wekilleri özlerinde alnyp barylýan ylmy işler bilen birek-biregi giňişleýin tanyşdyrdylar. Taraplar hyzmatdaşlyk etmäge özara gyzyklanmalaryny we ymtylmalaryny beýan etdiler.