Däp bolşy ýaly, Aşgabatda Halkara zenanlar gününiň öňüsyrasynda ýokary okuw mekdepleriň talyp gyzlarynyň arasynda her ýyl geçirilýän «Talyp gözeli» bäsleşiginiň jemleri jemlenýär. Jemleýji tapgyrda ýurdumyzyň esasy ýokary okuw mekdeplerine wekilçilik edýän 22 talyp gözellik ady ugrunda bäsleşdi.
Jemleýji synaglar Türkmenistanyň Nebit-gaz toplumynyň Medeniýet-işewürlik merkeziniň sahnasynda geçirildi. Bu ýerde gyzlar emin agzalaryna aýdym-saz, çeperçilik, öý hojalygynda başarnygyny we çeper elleriniň ussatlygyny görkezmelidiler.
Häzirki zaman gözeli durmuşda ençeme zatdan baş çykarmaly. Bäsleşige gatnaşanlaryň çykyşlaryndan görnüşi ýaly, gyzlarymyz islendik meseläni çözüp bilýärler. Olar öz görk-görmegini görkezmegi, milli lybasy gelşikli geýmegi, türkmeniň belli tagamy – unaş bişirmekde ukybyny görkezdiler. Galyberse-de, iňňedir sapakdan çeper eller bir bölek mata milli nagyşlary salmagyň hötdesinden geldiler.
Üç tapgyryň jemi boýunça talyplaryň gepleşik endiklerine we başarnyklaryna baha berýän eminler topary bäsleşigiň ýeňijilerini we baş baýragyň eýesini kesgitledi.
Magtymguly adyndaky Türkmen döwlet uniwersitetiniň üçünji ýyl talyby Akgözel Ýagmyrowa «Talyp gözeli – 2024» bäsleşiginiň ýeňijisi diýlip ykrar edildi.
Türkmen döwlet maliýe institutynyň talyby Aýgül Altyýewa 1-nji orny eýeledi. Ikinji orun birbada iki gyza – Döwletmämmet Azady adyndaky Türkmen milli dünýä dilleri institutynyň talyby Aýgül Allanowa we Türkmen döwlet binagärlik-gurluşyk institutynyň talyby Gülruh Halmyradowa berildi.
Üçünji orna Halkara ynsanperwer ylymlary we ösüş uniwersitetiniň talyby Leýli Ärnepesowa, Ýagşygeldi Kakaýew adyndaky halkara nebit we gaz uniwersitetiniň talyby Ogulnäzik Myşşyýewa we Türkmenistanyň Oguz han adyndaky Inžener-tehnologiýalar uniwersitetiniň talyby Gunça Jumageldiýewa mynasyp boldular.
Türkmenistanyň Bilim ministrliginiň, Türkmenistanyň Magtymguly adyndaky Ýaşlar guramasynyň we Zenanlar birleşiginiň Merkezi geňeşiniň guran «Talyp gözeli – 2024» bäsleşigi işjeň ýaşlaryň arasynda meşhurlyga eýedir. Bäsleşigiň finalyna çykmak we ýurdumyzyň ajap gözelleriniň hataryna girmegiň özi abraýdyr. Jemleýji finala gatnaşanlaryň hemmesine diplomlar we ýadygärlik sowgatlar gowşuryldy.
