I. Türkmenistanyň şu kanunçylyk namalaryna goşmaçalary we üýtgetmeleri girizmeli:

1. 2009-njy ýylyň 18-nji aprelinde Türkmenistanyň Kanuny bilen tassyklanylan Türkmenistanyň Zähmet kodeksine (Türkmenistanyň Mejlisiniň Maglumatlary, 2009 ý., № 2, 30-njy madda; 2010 ý., № 1, 6-njy madda, № 2, 34-nji madda; 2011 ý., № 1, 26-njy madda, № 4, 81-nji madda; 2012 ý., № 1, 12-nji madda; 2013 ý., № 2, 45-nji madda, № 3, 48-nji madda; 2014 ý., № 2, 76-njy madda, № 4, 129-njy we 151-nji maddalar; 2015 ý., № 1, 35-nji madda, № 3, 112-nji madda; 2016 ý., № 2, 101-nji madda; 2017 ý., № 1, 33-nji madda, № 3, 112-nji madda, № 4, 134-nji we 147-nji maddalar; 2018 ý., № 2, 48-nji madda; 2019 ý., № 1, 11-nji madda, № 4, 71-nji madda; 2020 ý., № 3, 48-nji madda; 2021 ý., № 1, 25-nji madda; Türkmenistanyň Milli Geňeşiniň Maglumatlary, 2022 ý., № 3, 74-nji madda; Türkmenistanyň Mejlisiniň Maglumatlary, 2023 ý., № 1, 5-nji madda, № 2, 33-nji madda) şu üýtgetmeleri girizmeli:

12-nji maddanyň üçünji böleginiň 1-nji bendinde «şahs» diýen sözden soň «ýa-da bellenen tertipde bellige alnan hünärmenlik hyzmatlaryny amala aşyrýan fiziki şahs» diýen sözleri goşmaly;

93-nji maddanyň mazmunynda «kepilnama» diýen sözi «güwänama» diýen söze çalşyrmaly;

94-nji maddanyň birinji we üçünji böleklerinde «kepilnamanyň» diýen sözi «güwänamanyň» diýen söze çalşyrmaly.

2. 2010-njy ýylyň 10-njy maýyndaky «Türkmenistanda adwokatura we adwokatlyk işi hakynda» Türkmenistanyň Kanunynyň (Türkmenistanyň Mejlisiniň Maglumatlary, 2010 ý., № 2, 29-njy madda; 2015 ý., № 3, 105-nji madda; 2017 ý., № 1, 13-nji madda; 2018 ý., № 2, 43-nji madda, № 4, 91-nji madda; 2019 ý., № 4, 63-nji madda, 2023 ý., № 2, 31-nji madda) 44-nji maddasynyň ikinji böleginiň 2-nji bendinden soň şu mazmunly bendi goşmaly:

«21) adwokatlar tarapyndan jenaýatçylykly ýol bilen alnan girdejileriň kanunlaşdyrylmagyna, terrorçylygyň maliýeleşdirilmegine we köpçülikleýin gyryş ýaragynyň ýaýradylmagynyň maliýeleşdirilmegine garşy hereket etmek hakynda Türkmenistanyň kanunçylygynyň talaplarynyň ýerine ýetirilişine gözegçiligi ygtyýarly edara bilen amala aşyrýar;».

3. 2019-njy ýylyň 30-njy noýabryndaky «Raýat ýagdaýynyň namalary hakynda» Türkmenistanyň Kanunynda (Türkmenistanyň Mejlisiniň Maglumatlary, 2019 ý., № 4, 85-nji madda; Türkmenistanyň Milli Geňeşiniň Maglumatlary, 2022 ý., № 3, 74-nji madda, Türkmenistanyň Mejlisiniň Maglumatlary, 2023 ý., № 2, 32-nji madda):

1) 19-njy maddanyň 5-nji bendini şu görnüşde beýan etmeli:

«5) raýat ýagdaýynyň namalarynyň döwlet belligine alynmagy bilen bagly arzalaryň we beýleki resminamalaryň görnüşlerini tassyklaýar;»;

2) 61-nji maddanyň birinji böleginiň 1-nji bendinde «çaganyň ata-enesiniň atalygy anyklamak hakynda bilelikdäki arzasy» diýen sözleri «atalygy anyklamak hakynda çaganyň ata-enesiniň bilelikdäki arzasy» diýen sözlere çalşyrmaly;

3) 63-nji maddanyň birinji böleginiň ikinji tesiminde «Ata-enäniň atalygy anyklamak hakynda bilelikdäki arzasynda» diýen sözleri «Atalygy anyklamak hakynda çaganyň ata-enesiniň bilelikdäki arzasynda» diýen sözlere çalşyrmaly;

4) 78-nji maddanyň bäşinji bölegine şu mazmunly tesimi goşmaly:

«Ölümi döwlet belligine alan RÝNÝ edarasy, bu barada döwlet belligine alnan aýyndan soňky aýyň bäşinden gijä galman öz ýerleşýän ýeri boýunça salgyt edarasyna we Türkmenistanyň Pensiýa gaznasynyň ýerli edarasyna habar bermelidir.».

II. Şu Kanun resmi taýdan çap edilen gününden herekete girizilýär.

Türkmenistanyň Prezidenti 

Serdar BERDIMUHAMEDOW.

Aşgabat şäheri,

2024-nji ýylyň 13-nji iýuly.