18-nji oktýabrda Hytaý Halk Respublikasynyň Sian şäherinde Ýagşygeldi Kakaýew adyndaky Halkara nebit we gaz uniwersiteti hem-de Hytaý guramalarynyň dördüsi Türkmenistanda Lu Ban ussahanasyny döretmek boýunça özara düşünişmek barada bäştaraplaýyn Ähtnama gol çekdi.
Hytaý tarapyndan Ähtnama Sian nebit uniwersiteti, Hebeý nebit hünär-tehniki uniwersiteti, Hytaýyň CNPC milli nebit we gaz korporasiýasy we Hytaýyň bilim ulgamynda halkara alyş-çalyş assosiasiýasy gatnaşdylar.
Dabarada çykyş edenler Türkmenistanda Lu Ban ussahanasynyň açylmagynyň çalt ösýän innowasiýa tehnologiýalary şertlerinde çuňňur bilimli we kärine ussat ýokary derejeli hünärmenleriň, inženerleriň, tehnologlaryň taýýarlanmagyna uly goşant goşjakdygyna ynam bildirdiler.
Türkmenistanda «Lu Ban ussahanasy» taslamasyny ilerletmek baradaky başlangyjyň 2023-nji ýylyň ýanwar aýynda Pekinde geçirilen gepleşiklerde Türkmenistanyň Prezidenti Serdar Berdimuhamedowyň we Hytaý Halk Respublikasynyň Başlygy Si Szinpiniň gol çeken Bilelikdäki beýannamada aýdylandygyny ýatladýarys.
Türkmenistanda Lu Ban ussahanasynyň döredilmegi baradaky özara düşünişmek barada Ähtnama gol çekmek dabarasy Ýagşygeldi Kakaýew adyndaky Halkara nebit we gaz uniwersitetiniň rektorynyň ýolbaşçylygyndaky türkmen wekiliýetiniň 16-njy oktýabrdan 20-nji oktýabry aralygynda Hytaý Halk Respublikasyna iş saparynyň esasy wakasy boldy.
Türkmen wekiliýeti 17-nji oktýabrda, ylym we bilim pudagynda hyzmatdaşlygy ösdürmek meselelerini ara alyp maslahatlaşmak üçin Hytaýyň Sian nebit uniwersitetine baryp gördüler. Hytaý uniwersitetiniň mugallymlary we okuwçylary bilen geçirilen maslahatda Ýagşygeldi Kakaýew adyndaky Halkara nebit we gaz uniwersitetiniň rektory milli ylym we bilim ulgamynyň kämilleşdirilmegi, sanly tehnologiýalaryň bilim ulgamyna ornaşdyrylyşy, şeýle hem türkmen nebit we gaz uniwersitetiniň gurluşy, onuň ylmy-barlag işleri we üstünlikleri barada çykyş etdi. Mundan başga-da, çykyşda Türkmenistanyň nebitgaz pudagyny ösdürmek we onuň maddy-tehniki binýadyny pugtalandyrmak barada gürrüň edildi.
Hytaýly kärdeşler bilen geçirilen duşuşykda «Lu Ban ussahanasy» taslamasynyň çäklerinde bilelikdäki iş meýilnamalary, şol sanda okuw meýilnamalary, hünärmenleri taýýarlamak we ussahanany zerur enjamlar bilen enjamlaşdyrmak meýilnamalary ara alnyp maslahatlaşyldy.
Lu Banyň ussahanalary diýlip meşhur gadymy hytaý oýlap tapyjysynyň hatyrasyna atlandyrylýar. Rowaýatlarda zähmetkeşleriň häli-häzire çenli ulanýan el gurallarynyň köpüsini şol şahsyýetiň özi ýasapdyr. Lu Ban adyndaky ussahanalaryň häzirki ugry Hytaýyň Týanszin şäherinde oýlanyp tapylýar. Olarda önümçilik awtomatlaşdyryş, energetika, gurluşyk, ulag, aragatnaşyk, IT we adaty hytaý lukmançylygy boýunça geljekki hünärmenleri hem taýýarlaýarlar.
Hytaýda dörän Lu Ban ussahanalary ulgamy bütin dünýäde meşhurlyk gazandy. Şeýle ussahanalar Aziýanyň, Ýewropanyň we Afrikanyň 20-den gowrak ýurdunda üstünlikli işleýär. Häzirki wagtda Lu Ban ussahanalary ylym we hünär bilim ulgamynda halkara alyş-çalyş hem-de hyzmatdaşlyk üçin meýdança döreden ägirt uly taslamadyr.
Hytaý Halk Respublikasyna iş saparynyň ahyrynda, 19-njy oktýabrda türkmen wekiliýeti Pekindäki Hytaýyň nebit uniwersitetine baryp gördi we ol ýerde bilim binalary, häzirki zaman barlaghanalary, ylmy-bilim işleri, okuw maksatnamalary we okuw meýilnamalary bilen tanyşdy. Myhmanlara Hytaý uniwersitetiniň taryhy we gazananlary bilen tanyşdyran uniwersitet muzeýine gezelenç guraldy.
Soňra türkmen uniwersitetiniň rektory hytaý uniwersitetiniň professor-mugallymlar düzüminiň wekilleri bilen duşuşyk geçirdi, onda iki uniwersitetiň arasynda ylym we bilim pudagy ara alnyp maslahatlaşyldy Ähtnamanyň çäklerinde alnyp barylýan işleriň gerimini giňeltmegiň we ilerletmegiň geljegine garaldy.
Esasy temalaryň arasynda uniwersitetleriň ýolbaşçylary Türkmen-Hytaý energetika okuw merkezini döretmek baradaky Ylalaşygyň taslamasyny we «Iki diplom» halkara bilim maksatnamasynyň tertipnamasynyň taslamasyny ara alyp maslahatlaşdylar.
