Döwletmämmet Azady adyndaky Türkmen milli dünýä dilleri instituty «Daşary ýurt dillerini okatmagyň innowasion usullary we tehnologiýalary» atly halkara ylmy-amaly maslahat geçirer. Maslahat Türkmenistanyň hemişelik Bitaraplygynyň 29 ýyllygyna we Türkmenistanda daşary ýurt dilleriniň okadylyşyny kämilleşdirmek baradaky maksatnamanyň durmuşa geçirilişiniň netijelerine bagyşlanýar.
Maslahat 5-6-njy dekabrda utgaşykly görnüşde geçiriler. Oňa gatnaşmaga ýokary we orta hünär okuw mekdepleriň, orta umumy bilim berýän mekdepleriň mugallymlary, ylmy-barlag edaralarynyň işgärleri, aspirantlar, doktorantlar, pudaklaýyn edaralaryň bilermenleri, dil bilimi, daşary ýurt dillerini okatmagyň usulyýeti, Türkmenistanyň hem-de daşary ýurtlaryň maglumat tehnologiýalary ulgamynyň hünärmenleri çagyrylýar.
Maslahatyň işine gatnaşmak isleýänler 1-nji noýabra çenli institutyň resmi saýtyndaky maslahat bölüminde ýüz tutmany ibermelidirler. Maslahat, gatnaşmagyň düzgünleri, tezisleriň beýany we çykyşlar baradaky giňişleýin maglumatlar ýokary okuw mekdebiň saýtyndaky täzelikler bölümde ýerleşdirilendir.
Forumy geçirmegiň maksady bilimiň ähli derejelerinde dilleri öwrediş ulgamynda maksatnamalaryň amala aşyrylmagy bilen baglanyşykly wajyp wezipeleri seljermek we iş ýüzünde çözmek babatda öňdebaryjy dünýä tejribesi dogrusynda umumylaşdyrylan düşünje bermekden, ylym-bilim ulgamyna innowasion tehnologiýalaryň ornaşdyrylyşynyň hiline garamakdan hem-de Türkmenistanda dil syýasatynyň gazananlaryny giňden görkezmekden ybaratdyr.
Halkara forumy guramagyň esasy maksatlarynyň biri netijeleri jemlemekden we 2017-nji ýylyň 22-nji dekabrynda kabul edilen «Türkmenistanda daşary ýurt dillerini okatmagy kämilleşdirmegiň Konsepsiýasynyň» durmuşa geçirilişine köptaraply baha berilmegini işläp düzmekden ybaratdyr. Maksatnama milli bilim ulgamynda alty ýylyň dowamynda üç tapgyrda amala aşyryldy we häzirki günde tamamlaýjy tapgyra geldi.
Halkara maslahat dil bilimine we mugallymçylyk ulgamynda öňdebaryjy hünärmenleri, dünýäniň dürli ýurtlaryndan görnükli alymlary, professorlary, mugallymlary barlaglary alyp barýan işgärleri bir ýere jemlejek möhüm waka bolar. Daşary döwletleriň ylmy-barlag merkezlerinden hem-de ýokary okuw mekdeplerinden ona golaý meşhur bilermenleriň we alymlaryň gatnaşmagyna garaşylýar.
Forumyň çäklerinde umumy mejlis, lingwistik we lingwodidaktik ugurlar boýunça çykyşlary özünde jemleýän tematiki bölümler, tegelek stollar, pikir alyşmalar geçiriler, Türkmenistanyň ýaş hünärmenleri hem-de talyplary üçin daşary ýurtly bilermenlerden ussatlyk sapaklary meýilleşdirildi.
Maslahatyň dowamynda Türkmenistanda daşary ýurt dillerini okatmagy kämilleşdirmekde gazanylan üstünlikler, dilleri öwrenmegiň lingwodidaktiki esaslary, dilleri okatmagyň häzirki zaman usullary we tehnologiýalary, daşary ýurt dillerini okatmak babatda halkara hyzmatdaşlyk, Türkmenistanda 2028-nji ýyla çenli umumybilim maksatnamalary boýunça okatmagyň usulyýetini kämilleşdirmegiň konsepsiýasy babatda geljegi uly wezipeler ýaly ugurlar boýunça çykyşlar diňleniler.
Maslahata gatnaşyjylar tejribe alyşmaga, öz ylmy-barlaglarynyň we işläp taýýarlamalarynyň netijelerini görkezmäge, daşary ýurt dillerini okatmakda häzirki zaman ýagdaýlaryny hem-de täzeçil tehnologiýalaryny ara alyp maslahatlaşmaga mümkinçilik alarlar.
Iri halkara forumyň geçirilmeginiň garaşylýan netijelerine aşakdakylar degişlidir, daşary ýurt dillerini okatmak babatda iň oňat tejribeleri hem-de üstünlikli işleri maslahatlaşmak, seljermek hem-de öňdebaryjy tejribäni umumylaşdyrmak, täze usulyýetleri ornaşdyrmagyň algoritmini işläp düzmek, mugallymlaryň hünär derejesini ýokarlandyrmak, halkara ylmy gatnaşyklary berkitmek, ylmy işleri çap etmek, bilim serişdelerini işläp taýýarlamak, sanly gurallary ösdürmek, ylmy-barlaglary höweslendirmek, aralykdan okatmagyň usulyýetini gowulandyrmak, bilim innowasiýalaryny goldamak.
Guramaçylar geçiriljek maslahatyň täze halkara gatnaşyklary ýola goýmak we däp bolan hyzmatdaşlygy pugtalandyrmak üçin netijeli meýdança öwrülip, hünär gatnaşyklarynyň berkidilmegine hem-de Türkmenistanyň we daşary ýurtlaryň daşary ýurt dilleri boýunça hünärmenleriniň arasynda giň ylmy gatnaşyklary ösdürmäge ýardam etjekdigine ynam bildirýärler. Forumyň geçirilmegi okatmagyň innowasion usullarynyň möhümdigini ýüze çykarmak bilen birlikde, oňa gatnaşyjylara mundan beýläk-de ylmy-barlaglary geçirmäge we mugallymçylykda üstünlikleri gazanmaga itergi berer.
