20-nji noýabrda Myrat Garryýew adyndaky Türkmenistanyň Döwlet lukmançylyk uniwersitetinde biologiýa boýunça III halkara internet olimpiadasy geçiriler.
Olimpiada gatnaşjaklary hasaba almak 10-njy noýabra çenli dowam edýär. Türkmenistanyň hem-de daşary ýurtlaryň ýokary okuw mekdepleriniň olimpiadada çykyş etmek isleýän talyplary Lukmançylyk uniwersitetiň saýtynda gatnaşmak üçin ýüz tutmany doldurmalydyrlar. Hasaba alnan talyplara olimpiada çenli bir gün galanda olaryň görkezen elektron salgysyna gatnaşmak üçin login we parol ugradylar.
Olimpiadanyň ýumuşlary biologiýanyň dürli bölümleri boýunça testler hem-de mysallar görnüşinde taýýarlanyldy. Şolary ýerine ýetirmek üçin talyplara 150 minut wagt berler.
Goşmaça maglumatlary türkmen ýokary okuw mekdebiniň saýtyndan, şeýle hem +993-12-48-99-32; +993-63-58-51-11 telefon belgileri we tdlu.iolimp@gmail.com elektron salgysy boýunça alyp bolar.
Olimpiada häzirki zaman ylmy we amaly wezipeleri seljermäge ukyply ýaş hünärmenleri taýýarlamak, ylmy-amaly maglumatlary, ylym we tehnika ulgamynda tejribeleri özara bähbitli alyşmak, şeýle hem Türkmenistanyň hem-de daşary ýurtlaryň ýokary okuw mekdepleriniň, professorlarynyň, mugallymlarynyň we talyplarynyň arasynda dostlukly gatnaşyklary pugtalandyrmak maksady bilen geçirilýär.
Zehinli ýaşlary ýüze çykarmak, ýaşlarda tebigy ylymlary öwrenmäge, döwrebap tehnologiýalary ulanmak arkaly nazaryýet meselelerini çözmäge gyzyklanma döretmek, talyplary hünäre ugrukdyrmak hem-de olaryň intellektual taýdan ösmegi üçin oňyn şertleri döretmek olimpiadanyň wezipelerine girýär.
