Indoneziýada dowam edýän ýaşlaryň arasynda sambo boýunça dünýä çempionatynda türkmen samboçylary ýene üç medal gazandylar. Bäsleşigiň ikinji gününde Türkmenistanyň milli ýygyndysy ilkinji altyn, bir kümüş we bir bürünç medala eýe boldy.
Ýaşlaryň arasynda (20 ýaşa çenli) söweş sambo görnüşi boýunça 71 kilograma çenli agram derejesinde dünýä çempiony bolan 18 ýaşly, Türkmen döwlet bedenterbiýe we sport institutynyň 1-nji ýyl talyby Yslam Hemraýew hormat münberiniň iň ýokarky basgançagyna çykdy. Bu agram derejesinde 8 türgen güýç synanyşdy. Hemraýew altyn medal ugrunda, üç ýeňiş gazandy: ilki bilen Gyrgyzystandan Azamat Temirbekowy, soňra bolsa 7:0 hasap bilen Ermenistandan Wadis Ambarsumýany we finalda Halkara sambo federasiýasynyň (FIAS) baýdagy astynda çykyş eden Russiýaly Gadir Gaşimowy 8:0 hasap bilen ýeňdi. Bu agramda bürünç medallara Wadis Ambarsumýan (Ermenistan) hem-de Pawel Napalkow (Ukraina) eýe boldylar.
Sport sambosy boýunça çykyş eden, Türkmen döwlet bedenterbiýe we sport institutynyň 3-nji ýyl talyby, 19 ýaşly Ykbal Saparowa kümüş medala eýe boldy, ol bu üstünligi 50 kilograma çenli agram derejesinde gazanyp, onda 10 türgen bäsleşdi. Y.Saparowa çärýek finalda Şahzoda Sadullaýewany (Özbegistan) 3:1 hasabynda ýeňdi, ýarym finalda Tamar Suhiaşwilini (Gruziýa) 8:0 hasabynda ýeňdi we finalda Halkara sambo federasiýasynyň baýdagy astynda çykyş eden Russiýaly 18 ýaşa çenli ýaşlaryň arasynda iki gezek dünýä çempiony Sofýa Soluýanowadan ýeňildi we ikinji orna mynasyp boldy. Tamar Suhiaşwili we Rumyniýaly Mariýa Naýdin münberiň üçünji basgançagyna çykdylar.
Türkmenistanyň Söweş sungaty milli federasiýasynyň 18 ýaşly türgeni Ilşat Döwranow toparymyz üçin bürünç medalyny gazandy. Ol 18 ýaşa çenli oglanlaryň arasynda sport sambosy boýunça 58 kilograma çenli agram derejesinde çykyş etdi, onda 15 türgen bäsleşdi. 1/8 finalda Ilşat Gazagystandan Meýrambek Miramgaliden 0:2 hasaby bilen ýeňildi. Emma ilkinji teselli tapgyrynda ol Özbegistanly Murat Orinowy 2:0 hasabynda, soň bolsa Fransiýaly Eliott Feýsi 2:0 hasabynda ýeňip, bürünç medal gazandy. Bu agramda ikinji bürünç medaly Ermenistanly türgen Narek Simonýan gazandy.
Şeýlelik-de, iki gün dowam eden ýaryşda türkmen samboçylary bäş medal gazandylar – bir altyn, üç kümüş we bir bürünç. Ýaşlaryň arasynda geçirilýän sambo boýunça dünýä çempionatynyň ilkinji gününde 20 ýaşa çenli ýaşlaryň arasynda söweş sambosynda iki kümüş medaly, Türkmenistanyň Söweş sungaty milli federasiýasynyň 18 ýaşly türgeni Rasul Jabraýilow (64 kilograma çenli) we Türkmen döwlet bedenterbiýe we sport institutynyň 2-nji ýyl talyby, 19 ýaşly Mälikberdi Begiýew (88 kilograma çenli) gazandylar.
Indoneziýada geçirilýän dünýä çempionatyna 34 ýurtdan 383 türgen gatnaşýar, olar üç günüň dowamynda ýetginjekleriň (16-18 ýaş) we ýaşlaryň (18-20 ýaş) arasynda sport we söweş sambo boýunça 37 medal ugrunda bäsleşýärler.
