Daşky gurşawy goramagyň bütindünýä güni mynasybetli Türkmenistanyň Ylymlar akademiýasynyň Tehnologiýalar merkezinde «Önümçilik galyndylaryndan ekologiýa taýdan arassa täze önümleri almagyň tehnologiýalary» atly ylmy maslahaty geçirildi.
Türkmenistanyň Ylymlar akademiýasynyň Tehnologiýalar merkeziniň direktory, himiýa ylymlarynyň doktory Durdymyrat Gadamowyň giriş sözünden soň, TYA-nyň Tehnologiýalar merkeziniň Daşky gurşawy goramagyň tehnologiýalary barlaghanasynyň müdiri, tehniki ylymlaryň kandidaty Gurbanýazow Meretdurdy topragyň, suwuň, howanyň arassalygyny gorap saklamak we olary dürli zyýanly maddalardan arassalamak boýunça ylmy-gözleg işlerini alyp barýan, şeýle hem tebigy we antropogen faktorlaryň daşky gurşawyň ýagdaýyna edýän täsirini öwrenýän «Howanyň üýtgemegine parnik gazlarynyň edýän täsiri» mowzugynda çykyş etdi.
TYA-nyň Tehnologiýalar merkeziniň beýleki alymlary-da: Nanotehnologiýalar barlaghanasynyň uly ylmy işgäri Amannazarowa Dünýägözel «Uglewodorod oksitlendiriji mikroorganizmleri nebit dargadyjylary ýüze çykarmagyň innowasion usuly», Iýmit tehnologiýalary barlaghanasynyň müdiri Muhammetgulyýewa Hurma «Plastiki galyndylaryň «In vivo» şertlerinde biodargadylmagy», Daşky gurşawy goramagyň tehnologiýalary barlaghanasynyň ylmy işgäri Myradowa Hallygözel «Tebigata meňzeş biomassany ýüpek gurçuklaryny idetmekde ulanmak boýunça ylmy barlaglaryň netijeleri», Energiýany öndürmegiň we tygşytlamagyň hem-de metrologiýa ölçeg serişdelerini barlaýan ylmy barlaghananyň uly ylmy işgäri Gurbangeldiýew Begli «Ekologiýanyň ylym hökmünde emele gelmegi we gysgaça ösüş taryhy» ýaly gyzykly ylmy çykyşlar etdiler.
Maslahatyň işine ýurdumyzyň ýokary okuw mekdeplerinden – S.A.Nyýazow adyndaky Türkmen oba hojalyk uniwersitetiniň, Magtymguly adyndaky Türkmen döwlet uniwersitetiniň we Ýagşygeldi Kakaýew adyndaky Halkara nebit we gaz uniwersitetiniň mugallymlary, talyplary gatnaşdylar. Olar öz çykyşlaryny gawuny galyndysyz täzeden işlemek tehnologiýasyny kämilleşdirmäge, ýag önümçiligi galyndylaryny gaýtadan işlemek usulyna, ýerli çig maldan ekologiýa taýdan arassa antifriz alnyşyna, howanyň üýtgemeginiň sebäplerine we olaryň öňüni almak boýunça çärelere bagyşladylar.
