Türkmen kinorežissýory Sahysalyh Baýramowyň «Daragt» çeper filmi 23–29-njy maý aralygynda Çuwaş Respublikasynda (RF) geçirilen XVII Çeboksary halkara kinofestiwalynda eminler toparynyň ýörite baýragyna mynasyp boldy.

Oguzhan adyndaky «Türkmenfilm» birleşiginde surata düşürilen bu film «Wolžskiý» kinoteatrynda bäsleşik maksatnamasynyň çäklerinde görkezildi.

Filme Ermenistanyň we Russiýa Federasiýasynyň tanymal kino işgärlerinden ybarat bilermenler topary baha berdi.

Halkara kinofestiwala 15 ýurtdan kinorežissýorlar geldi. Bäsleşigiň temasy etnik we sebit kinosyna bagyşlandy.

Oguzhan adyndaky «Türkmenfilm» birleşiginiň ýokary hilli mazmunly film öndürmek boýunça ýurdumyzda öňdebaryjy kärhanadygyny bellemek gerek. Her ýyl ýurdumyzyň medeniýetini, taryhyny we häzirki durmuşyny görkezýän dürli žanrly täze filmler kinoekranlaryna çykýar.

Kinostudiýada iş hiç wagt tamamlanmaýar. Häzirki wagtda «Magtymguly» atly täze film surata düşürilýär, «Atalar we ogullar» çeper-publisistik filmi, şeýle hem «Ependi» çeper filmi taýýarlanylýar.