Şu gün Türkmenistanyň Prezidenti Gurbanguly Berdimuhamedow düýn iş sapary bilen Aşgabada gelen Amerikanyň Birleşen Ştatlarynyň Döwlet sekretarynyň Günorta we Merkezi Aziýa meseleleri boýunça kömekçisi Robert Bleýki kabul etdi.

Myhman ýüzbe-ýüz duşuşyk üçin hoşallyk bildirip, döwlet Başutanyna ABŞ-nyň Prezidenti Barak Obamanyň we ABŞ-nyň Döwlet sekretary Hillari Klintonyň salamyny we iki döwletiň özara gatnaşyklarynyň taryhynda möhüm sene bolan Türkmenistan bilen Amerikanyň Birleşen Ştatlarynyň arasynda diplomatik gatnaşyklarynyň ýola goýulmagynyň 20 ýyllygy mynasybetli iberen gutlaglaryny ýetirdi. Jenap Robert Bleýkiň belleýşi ýaly, ABŞ-da ygtybarly, öz borjuna wepaly we uzak möhletleýin hyzmatdaş hasaplanýan Türkmenistan bilen ýola goýulýan gatnaşyklaryň ösdürilmegine uly ähmiýet berilýär.

Hormatly Prezidentimiz Gurbanguly Berdimuhamedow işjeň we uzakmöhletleýin esasda ýola goýulýan hem-de soňky ýyllarda sazlaşykly ösüşe eýe bolýan türkmen-amerikan gatnaşyklarynyň ýokary derejesini kanagatlanma bilen belledi we Türkmenistanyň ABŞ bilen özara gatnaşyklar boýunça köpýyllyk tejribelere we gatnaşyklaryň ösdürilmegi üçin bar bolan ägirt uly mümkinçiliklere esaslanýan hyzmatdaşlyga aýratyn ähmiýet berýändigini aýtdy.

Türkmen Lideriniň belleýşi ýaly, söwda-ykdysady gatnaşyklarynyň gerimini yzygiderli giňeltmek, şeýle hem ähli degişli düzümleri, şol sanda ulag we aragatnaşyk ulgamyny kämilleşdirmek biziň ýurdumyzda amala aşyrylýan “açyk gapylar” we özara bäbitli halkara hyzmatdaşlyk syýasatynyň möhüm ugurlarynyň biri bolup durýar. Şunuň bilen baglylykda, hormatly Prezidentimiz Gurbanguly Berdimuhamedow Türkmenistanyň bu pudaklar boýunça ägirt uly önümçilik we ylmy-tilsimatlaýyn tejribelere eýe bolan Amerikanyň kompaniýalary bilen täze gatnaşyklary ýola goýmaga taýýardygyny tassyklady.

Duşuşygyň barşynda ikitaraplaýyn gatnaşyklaryň häzirki ýagdaýy we geljegi, onuň ileri tutulýan ugurlary barada gyzyklanma bildirilip pikir alyşmalar boldy. Milli Liderimiz we ABŞ-nyň Döwlet departamentiniň ýokary wezipeli wekili ählumumy howpsuzlygy üpjün etmek, şeýle hem söwda-ykdysady, ýangyç-energetika pudaklarynda we maýa goýum ulgamynda özara gatnaşyklary ýola goýmak babatdaky hyzmatdaşlygyň möhüm ugurlarynyň üstünde durup geçdiler. Şunuň bilen baglylykda, jenap Robert Bleýk Amerikanyň kompaniýalarynyň Türkmenistan bilen ýola goýulýan gatnaşyklary pugtalandyrmaga we netijeli hyzmatdaşlygy mundan beýläk-de ösdürmäge uly gyzyklanma bildirýändigini belledi.

Amerikaly diplomat ABŞ-da Türkmenistanyň häzirki zamanyň möhüm meseleleriniň derwaýys çözgütleriniň tapylmagyna, ählumumy energetiki howpsuzlygyň üpjün edilmegine, umumy abadançylygyň we durnukly ösüşiň talaplaryna jogap bolup durýan özara peýdaly hyzmatdaşlygyň ýola goýulmagyna gönükdirilen halkara başlangyçlarynyň giňden goldanylýandygyny belledi. Gürrüňi dowam etmek bilen, jenap Robert Bleýk ABŞ Türkmenistanyň Merkezi Aziýa sebitinde durnuklylygyň hem-de ösüşiň üpjün edilmegi, hususan-da, Owganystanyň durmuş-ykdysady taýdan dikeldilmegi ugrunda durmuşa geçirýän tagallalaryna ýokary baha berýär diýip aýtdy. Şeýle hem ol Türkmenistan –Owganystan—Pakistan—Hindistan gaz geçirijisiniň taslamasynyň durmuşa geçirilmeginde Türkmenistanyň Prezidenti Gurbanguly Berdimuhamedowyň tagallasynyň möhüm ornuny ABŞ-nyň hökümeti oňlaýar we sebitiň döwletleriniň arasynda ygtybarly baglanyşdyryjy düzüm boljak bu transmilli taslamanyň olaryň ykdysady taýdan ýakynlaşmagyny üpjün etmekde, şol sanda Owganystanyň ykdysadyýetiniň dikeldilmegine we bu ýurtda durmuş derejesiniň ýokarlanmagyna ýardam bermekde derwaýysdyr diýip, ABŞ-nyň Döwlet departamentiniň ýokary wezipeli wekili nygtady.

Duşuşygyň barşynda 2012-nji ýylyň fewral aýynda Türkmenistanyň Prezidentldigine saýlawlaryň boljakdygy barada gürrüň edildi. Şu jähetlden ABŞ-nyň Döwlet sekretarynyň kömekçisi bu möhüm jemgyýetçilik-syýasy çäre Türkmenistanda demokratik, syýasy we durmuş-ykdysady özgertmeleriň üstünliklerini beýan etmek üçin amatly mümkinçilikdir diýip aýtdy.

Bellenilişi ýaly, Türkmenistanyň alyp barýan işjeň özgertmeler syýasaty ýurduň hemmetaraplaýyn ösüşiniň kepili bolmak bilen, türkmen-amerikan gatnaşyklaryny işjeňleşdirmek, netijeli işewür gatnaşyklary giňeltmek üçin amatly mümkinçilikleri açýar.

Şeýle hem duşuşygyň barşynda häzirki döwürde türkmen-amerikan gatnaşyklarynyň medeni-gumanitar ulgamda hem ösdürilýändigi bellenildi. Şu günler Waşingtonda ABŞ-da Türkmenistanyň Medeniýet günleriniň geçirilmegi munuň aýdyň subutnamasydyr.

Hormatly Prezidentimiz we myhman hoşlaşanlarynda Türkmenistan bilen Amerikanyň Birleşen Ştatlarynyň arsyndaky hyzmatdaşlygyň ägirt uly mümkinçiliginiň bardygyny belläp, taraplaryň iki ýurduň halklarynyň abadançylygynyň, gatnaşyklaryň çuňlaşdyrylmagynyň we hyzmatdaşlygy hemmetaraplaýyn ösdürmegiň hatyrasyna bilelikdäki tagallalara taýýardygyny tassykladylar.

Duşuşyga ABŞ-nyň Türkmenistandaky Adatdan daşary we Doly ygtyýarly ilçisi Robert Ýujin Patterson gatnaşdy.

***

Amerikanyň Birleşen Ştatlarynyň Döwlet sekretarynyň Günorta we Merkezi Aziýa meseleleri boýunça kömekçisi jenap Robert Bleýkiň biziň ýurdumyzda saparda bolmagynyň çäklerinde Türkmenistanyň hökümetinde duşuşyklary boldy.

Ikitaraplaýyn gepleşiklerde daşary syýasat ulgamynyň gatnaşyklaryna, sebitde durnuklylygyň we howpsuzlygyň üpjün edilmegine, döwrüň wehimlerine garşy durmagyň, şeýle hem söwda-ykdysady we beýleki pudaklarda ýola goýulýan ikitaraplaýyn hyzmatdaşlygyň möhüm ugurlaryna degişli meseleleriň giň toplumyna seredildi. Duşuşyklaryň barşynda deňhukukly we özara bähbitli türkmen-amerikan gatnaşyklaryny ähli ugurlarda ösdürmegiň anyk ugurlary kesgitlendi.